राष्ट्रपतिया कार्यक्षेत्र बारेया रिट खारेज

तत्कालिन एनेकपा (माओवादी) सरकारं बर्खास्त याम्ह तत्कालिन प्रधानसेनापतियात थमौती यायेत राष्ट्रपतिं ल्ह्वंगु पलाः विरुद्ध लाःगु रिट सर्वोच्च अदालतं खारेज याःगु दु ।

राष्ट्रपति डा. रामवरण यादवं तत्कालीन प्रधानसेनापति रुकमाङ्ग कटुवालयात थमौति यायेत ल्ह्वंगु पला व राष्ट्रपतिया कार्यक्षेत्रया बारे न्ह्यसः थनाः लाःगु रिटयात बिहीवाः न्यायाधिसत तपबहादुर मगर, प्रेम शर्मा व मोहनप्रसाद सिटौलाया पूर्ण इजलासं खारेज याःगु खः ।

इन्हुरेड इन्टरनेशनलया पाखें श्रीकृष्ण सुवेदीं तःगु रिटय् सर्वोच्चया पूर्ण इजलासं सैनिक ऐन संशोधन जुइधुंकूगु, प्रधानसेनापतियात बर्खास्त याःगु सरकार व चीकूम्ह प्रधानसेनापति निगलिं पदय् मदयेधुंकूगु अवस्थाय् थुकीया बारे न्ववसाः थप विवाद जुइगु जूगुलिं रिट खारेज याःगु खः ।