सत्तारुढ दलतय्सं निर्वाचन प्रकृया लिछ्यायेत इनाप याइगु
सरकारया नेतृत्व यानाच्वंगु नेकपा (एमाले) बाहेकया सत्तारुढ दलं वर्तमान प्रधानमन्त्रीया निर्वाचन प्रकृया लच्छिया निंतिं लिछ्यायेत सभामुख यायेत इनाप यायेगु निर्णय याःगु दु ।
बिहीवाः सिंहदरवारस्थित नेपाली कांग्रेसया संसदीय दलया ज्याकूथी च्वंगु कांग्रेस सहित सत्तारुढ दलया बैठकं राष्ट्रिय सहमतिया विकल्प मदुगु धासें सभामुखयात निर्वाचन प्रकृया लच्छिया निंतिं लिछ्यायेत इनाप यायेगु निर्णय याःगु खः ।
कांग्रेसं राष्ट्रिय सहमतिया बल्लागु आधार तयार मजुइकं प्रधानमन्त्रीया निर्वाचनं उम्मेदवारी लितमकायेगु अडान कायाच्वंगु दु । राष्ट्रिय सहमति निर्माणयात हे मू मुद्दा दयेकाः कांग्रेसं म्हिग माओवादी नाप ४गू बुँदे प्रस्ताव तःगु खःसा उकीया बारे थौं सुथय् कांग्रेस नेता नापं प्रधानमन्त्रीया उम्मेदवार रामचन्द्र पौडेलं प्रधानमन्त्री माधवकुमार नेपालनाप सहलह यानादीगु खः । उगु इलय् नं पौडेलं राष्ट्रिय सहमति निर्माण मजुइकं उम्मेदवारी लितमकायेगु अडान लिसाकयादीगु खः ।
