'मधेसीतय्त मतदान पाखें वञ्चित यायेगु कुत जुसाः विद्रोह'
मधेशी जनअधिकार फोरमया अध्यक्ष उपेन्द्र यादवं मधेसीतय्त मतदान पाखें वञ्चित यायेगु कुतः याःसा मधेसय् विद्रोह यायेगु ख्याच्वः बियादीगु दु । वय्कलं नागरिकता इनेगु ज्या मयासें मतदाता परिचयपत्र इनाः मधेसीतय् मतदान पाखें वञ्चित यायेगु कुतः यानाच्वंगु द्वपं बियादिल ।
रिपोटर्स क्लबं बिहीवाः येँय् याःगु साक्षात्कार ज्याझ्वलय् अध्यक्ष यादवं आः नं मधेसय् ३३ लख मनूत नागरिकता बिहीन अवस्थाय् दुगु धयादिसें थंज्याःगु इलय् नागरिकताया आधारय् मतदाना परिचयपत्र इनेगु धइगु मधेसीतय्त मतदान पाखें विाचत यायेगु ज्या जूगु धयादिल । वय्कलं नागरिकताया पलेसाः मेगू पिरचयपत्रया लिधंसाय् मतदाता नामावली संकलन यायेत इनाप नं यानादिल ।
यादवं मधेसीतय्त गौर नेपाली दयेकेगु कुतः जूगु धयादिसें नागरिकता इने न्ह्यः हे मतदाता परिचयपत्र इनेगु ज्यायात षड्यन्त्रया संज्ञा बियादिल । वय्कल वर्तमान सरकार व निर्वाचन आयोग मधेसीतय् विरुद्ध जूगु द्वपं नं बियादिल ।
उखे संघीय लिम्बुवान रज्य परिषदं मतदाता नामावली संकलन अभिनयात संघीयता व लिम्बुवान स्वायत्त विरुद्ध जूगु ठहर यासें मतदाता नामावली संकलनया ज्वलंत कजय् काःगु दु । परिषदं संघीयता व लिम्बुवान राज्यया ग्यारेन्टी मजुइकं निर्वाचनया छुं नं गतिविधि न्ह्याकेमबीगु खँ धाःगु दु ।
