कांग्रेसयात उम्मेदवारी लितकायेत ११दलया इनाप
निगू तःधंगु वाम दल एनेकपा (माओवादी) व नेकपा (एमाले) लगायत ११दलं नेपाली प्रधानमन्त्रीया निर्वाचनं कांग्रेसयात उम्मेदवारी लितकायेत इनाप याःगु दु ।
थौं माओवादी संसदीय दलया ज्याकूथी च्वंगु बैठकय् राष्ट्रिय सहमति दयेकाः न्ह्याः वनेमाःगु खँय् बः ब्यूसें ११दलं कांग्रेसयात उम्मेदवारी लितकायेत इनाप याःगु खः । अथेहे दलतय्सं सहमतिया आधारय् सरकार गठन यायेगु निंतिं नियमावली हिलेत सभामुखयात इनाप यायेगु निर्णय नं याःगु दु ।
यदि संसदया नियमावली संशोधन याये मिलेमज्यूसाः आः सभामुखं विशेषाधीकार छ्यलेमाःगु बारे नं सहलह याःगु खः । माओवादी व एमालें धाःसा संसदय् प्रधानमन्त्री ल्ययेगु झ्वलय् खनेदुगु गतिरोध क्वचायेकेत आः सभामुखं विशेषाधीकार छ्यलेमाःगु निश्कर्ष पिकाःगु खः । थुकीया बारे कानुन व्यवसायीतनाप थप सहलह यायेगु निर्णय बैठकं याःगु दु ।
माओवादी व एमाले दथुइ असोज १ गते जूगु प्यंगू बुँदे सहमति कथं माओवादीं उम्मेदवारी लितकाःसां कांग्रेसं उकी आपत्ति प्वंकाः यथास्थितिलय् उम्मेदवारी लितमकायेगु अडान कचाच्वंगु दु ।
