'शान्ति व संविधान निर्माणया निंतिं मधेसी नेतृत्व सक्षम'
मधेसी जनअधिकार फोरम लोकतान्त्रीकया अध्यक्ष विजयकुमार गच्छदारं स्वंगू तःधंगु दलतय्सं राष्ट्रिय सहमति मदयेकूसाः सहमतिया सरकार गठन यायेमफुगु दावी यानादीगु दु । थौं यलय् मधेशी किसान फोरम लोकतान्त्रीकया न्हापांगु राष्ट्रिय भेलाया समापन ज्याझ्वलय् अध्यक्ष गच्छदारं स्वंगू तःधंगु दल शान्ति व संविधान निर्माणय् असफल जूगु दावी यानादिल ।
वय्कलं राजनितिक गतिरोध क्वचायेकेत मधेसवादी दलतय् भूमिका महत्वपूर्ण जूगु लुमंकादिसें शान्ति व संविधान निर्माणया निंतिं मधेसी नेतृत्व सक्षम जूगु दावी नं यानादिल । मधेसी दलंतय्सं सरकार स्वयां शान्ति व संविधान चाहे जूगुलिं थःपिं संयमित जूगु गच्छदारया धापू दु ।
असोज ११ गते निसें निन्हु तक न्ह्याःगु किसानया न्हापांगु राष्ट्रिय सम्मेलनय् लक्ष्मणप्रसाद मेहताया अध्यक्षताय् २५म्ह दुजः दुगु कार्यसमिति स्वंगु दु ।
