सरकार-सेना तनावय् न्हूगु मोड

सरकार व सेना दथुइ छुं ई न्ह्यवंनिसें ब्वलनाच्वंगु कचवं अन्ततः प्रधानसेनापतियात पदं अवकास बीगु अवस्था तक थ्यंगु दु । सरकारं थ्वहे बिचाः तयाः प्रधानसेनापति रुक्मांगत कटवालयात २४ घौया दुने लिसः बीमाःगु कथं स्पष्टीकरणया पौ बियाः न्ह्यसः छ्वःगु खः । थुकिं यानाः देशय् सेना व सरकार जक मखु सेनायात समर्थन याईपं व सरकारयात समर्थन याईपं राजनीतिक पार्टीतय् दथुइ तकं न्हूगु कथंया तनाव ब्वलंगु दु ।

निश्चय नं सेना छगू संवेदनशील निकाय जूगुलिं उकियात म्वाःसां म्वाःसां थियाच्वनेगु उचित मखु । तर नेपाःया सन्दर्भय् देशय् गुगु हिउपाः वःगु खः उकियात सेनां आत्मसात याये मफुगु व उकिं यानाः जनतां ल्ययाहःगु सरकारयात तकं हाथ्या बीकथंया ज्याखँ यानाहःगु कारणं स्थितियात भयावह रुप बीगु ज्या जूवंगु खनेदु । सरकारं प्रधान सेनापतियाके गुगु सन्दर्भ स्वानाः न्ह्यसः न्यंगु खः व तसकं सान्दर्भिक न्ह्यसः खः । राष्ट्रिय खेलकुद बहिष्कार याःगु, सरकारं धायेक धायेक नं न्हूगु भर्ती काःगु व अवकासप्राप्त च्याम्ह रथीतय् सम्बन्धय् सर्वोच्च अदालतया निर्णयया लिखत वये न्ह्यः हे उमित हानं फुलि तयाः वहाली याःगु थेंज्याःगु ज्यायात कयाः सरकारं थ्व न्ह्यसः न्यंगु खः । सेनां याःगु थ्व ज्या तप्यंक हे सरकारयात याःगु हाथ्या खः । यदि सेनायात थथे हे निरंकुश यानाः त्वःता तल धाःसा कन्हय् थ्वं अझ उग्र रुप क्यनीगु खतरा दु । उकिं सेनायात यदि धाथें हे नागरिक सत्ताया मातहत तयेगु खःसा सकलें राजनीतिक पार्टीत छप्पँ जुयाः सेनायात थज्याःगु अराजक हरकत ज्या यायेगुपाखें अवश्य नं पनेमाःगु दु ।

More Stories Like this