बैठक मच्वनाः कांग्रेस नेतातय्त मर्का
येँ (सन्ध्या टाइम्स)/ नेपाली कांग्रेसया झिंनिक्वःगु महाधिवेशन क्वचायेधुंकाः नं न्हूगु केन्द्रीय कमिटीया बैठक धाःसा मच्वंगु कारणं पिनें वयाच्वंपिं नेतातय्त समस्या जूगु दु ।
मोहनि नखः लिक्क वयेधुंकूगु अवस्थाय् केन्द्रीय कमिटीया न्हापांगु बैठक च्वनाः मनोनित यायेमाःपिं नेतातय्त मनोनित यायेगु नापं आः पार्टी गुकथं न्ह्याः वनी धइगु विषयसं सहलह यायेमाःगु ज्या दुसां पार्टीं धाःसा बैठक तकं मसःतूगु कारणं पिनें वयाच्वंपिं नेतातय् 'च्वने ला, वने ला' जुयाच्वंगु खँ धाःगु दु ।
पार्टीया न्हूम्ह सभापति सुशिल कोइराला चुनावय् त्याः कुन्हुंनिसें हे अस्पताल भर्ना जुइमाःगुलिं कांग्रेसया बैठक च्वने मफुगु खँ धाःगु दु। थ्व हे झ्वलय् पार्टी सभापति कोइराला थौं डिस्चार्ज जुयाः छेँय् लिहां झाइगु जूगु दु। वय्कः वंगु ६ गतेनिसें टिचिंग अस्पतालय् भर्ना जुयादीगु खः। वय्कः छेँय् लिहां वने धुंकाः केन्द्रीय कमिटीया बैठक सःतेगु बारे सहलह जुइगु वरिष्ठ नेतातय्सं केन्द्रीय नेतातय्त धयादीगु दु। उलि जक मखु चुनावय् त्याःपिं नेतातय्सं आः तक नं दुजः पदया दसिपौ नं काये मखंनि ।
