जनजाति सभासद्तय्सं मंकाः अवधारणा दयेकीगु
येँ (सन्ध्या टाइम्स)/संविधानसभाया म्याद थप याःसां नं न्हूगु संविधानया निंतिं मूमू राजनीतिक दलतय्सं माःगु कथं भूमिका म्हिता मच्वंगु नापं राज्य पुनर्संरचनाया सवालय् अलमल यानाच्वंगुलिं आः आदिवासी जनजाति सभासद्तय्सं मंकाः कथं अवधारणा दयेकाः न्ह्याः वनीगु जूगु दु ।
आदिवासी जनजाति सभासद् सभा 'ककस' व यूएनडीपीया संवैधानिक संवाद केन्द्रं न्ह्याकाच्वंगु आदिवासी जनजाति सभासद् व राज्य पुनरर्संचनाया सवालया विज्ञतय्गु दथुइ थ्व खँ पिहां वःगु खः ।
म्हिगःनिसें न्ह्यानाच्वंगु उगु सहलह ज्याझ्वः थौं नं जारी जुयाच्वंगु दु। थौं डा. विश्वम्भर प्याकुरेल, डा. पुष्पराज राजकर्णिकारपिंसं थःथःगु ज्यापौ न्ह्यब्वयादी। अथे हे म्हिगः डा. पिताम्बर शर्मा, डा. गोविन्द नेपाल व डा. चन्द्र अधिकारीं ज्यापौ न्ह्यब्वयादीगु खः ।
उगु ज्याझ्वलय् आदिवासी जनजाति सभासदतय्सं संविधानसभाया विषयगत समितितपाखें तयार याःगु प्रतिवेदन अध्ययन समितिइ छ्वयातःगु अले अनं लिपा ज्या न्ह्याना मच्वंगुलिं आः तप्यंक हे संवैधानिक समितिइ छ्वयेमाः धकाः आदिवासी जनजाति सभासद्तय्सं मंकाः कथं खँ पित हयेगु विषयय् नं सहलह जुयाच्वंगु दु ।
ज्याझ्वलय् राज्य पुनर्संरचनायात गुकथं बैज्ञानिक यायेफइ नापं आदिवासी जनजाति व लिउने लानाच्वंगु समुदायया भावना कःघाये फइ धइगु खँय् गम्भिर सहलह जुयाच्वंगु दु ।
