तुइन चबुनाः खुसिइ स्वम्ह बेपत्ता

येँ (सन्ध्या टाइम्स)/रसुवा जिल्लाय् ताँ मदुगु खुसि पार यायेत तयातःगु तुइनया थां दुनाः खुसिइ कुतुंवंपिं स्वम्ह मनू बेपत्ता जूगु दु ।

त्रिशुली खुसि पार यायेगु झ्वलय् इपिं तुइनय् च्वनाः वनाच्वंगु खः। आकाझाकां तुइनया थां दुनाः स्वम्हं खुसिइ कुतुं वंगु खः। उमित आः तक माले मफुनिगु खँ स्थानीय प्रहरीं धाःगु दु ।

रसुवा जिल्लाया मैलम गांया उत्तर हाकु गाउँ विकास समिति वडा नं. ९ व राम्चे गाविस वडा नं. १ गाम्चेया दथुइ दाङगाडी धइगु थासय् तयातःगु उगु तुइन पारी वनेत्यंगु इलय् उगु दुर्घटना जूगु खः ।

उकी लानाः हाकु गाविसया १८ दँ दुम्ह सुबोध तामाङ, २२ दँया नीरमाया तामाङ व १८ दँया वीरबहादुर तामाङ बेपत्ता जूगु
खः। म्हिगः जूगु उगु दुर्घटनाय् लानाः बेपत्ता जूपिंत मालेगु लागिं स्थानीय मनूत व प्रहरी सक्रिय जुयाच्वंगु दु ।