सहमतिया खाका तयार मजुइकं कांग्रेसं उम्मेदवारी लितमकाइगु
नेपाली कांग्रेसं सहमतिया विस्तृत खाका तयार मजुइकं प्रधानमन्त्रीया निर्वाचन पाखें उम्मेदवारी लितमकाइगु जूगु दु । बुधवाः सुथय् कांग्रेसया संसदीय दलया ज्याकूथी च्वंगु कांग्रेस नेतातय् बैठकं सहमतिया खाका तयार मजुइकं उम्मेदवारी लितमकायेगु अडान लिसाः काःगु खः ।
कांग्रेसं उम्मेदवारी लितकाये न्ह्यः सरकारया नेतृत्व नापं सत्ता गठबन्धनया बारे स्पष्ट यायेमाःगु खँ धाःगु दु । कांग्रेसं थुगु प्रस्ताव एनेकपा (माओवादी) व नेकपा (एमाले) दथुइ पेश यायेगु निर्णय याःगु दु । थुकीया निंतिं कांग्रेसं थौं निगू दलनाप बिस्कं बिस्कं बैठक च्वनीगु व लिपा स्वंगू दलया मंकाः बैठक नं आह्वान याःगु दु ।
प्रधानमन्त्रीया निर्वाचनय् माओवादी अध्यक्ष पुष्पकमल दाहाल 'प्रचण्डं' थःगु उम्मेदवारी लितकाये धुंकाः कांग्रेस संसदीय दलया नेता रामचन्द्र पौडेल याकचा मैदानय् दी । थ्वहे दथुइ कन्हय् जुइत्यंगु गुक्वःगु चरणया प्रधानमन्त्री निर्वाचन न्ह्यः हे दलत सहमति यायेगु कुतःलय् लगे जुयाच्वंगु दु ।
