झिगू दलया बैठकय् बजेटया बारे सहलह
सत्तारुढ झिगू दलया बैठकय् बजेटया बारे सहलह जूगु दु । बैठकय् झिगू दलं प्रधानमन्त्री माधवकुमार नेपालयात बजेटया तयारीलय् लगे जुइत इनाप नं याःगु दु । झिगू दलं आः तक नं बजेट मवःगु कारणं विकास निर्माणया ज्या लगायत दक्वं ज्या ठप्प जूगु धासें बजेट ह्येगु तयारी यायेत इनाप याःगु खः । नेतातय्सं असोज दुने नं न्हूगु सरकार गठन जुइमफुसाः कात्तिकया न्हापांगु वालय् बजेट ह्येत सुझाव ब्यूगु खः ।
प्रधानमन्त्रीया ज्याकू सिंहदरवारय् जूगु सहलहय् कांग्रेस नेता रामचन्द्र पौडेलं धाःसा बजेटया अन्यौल चीकेगु बारे सरकारया नेतृत्व यानाच्वंगु एमालें ठोस बिचाः यायेमाःगु धयादिल । अथेहे वय्कलं माओवादी नाप एमालें याःगु सहमतिया बारेय् नं प्रष्ट यायेत इनाप यानादीगु खः । पौडेलया थुगु खँय् मधेशवादी दलं न सहमति प्वंकूगु खः ।
थ्वहे दथुइ सभामुख सुभाषचन्द्र नेम्वाङं स्वंगू तधंगु दल व मधेशी मोर्चा नाप सहलहल ब्याकूगु दु । जारी राजनीतिक गतिरोध क्वचयोकेगु निंतिं सभामुख नेम्वाङं दलतय्त सःतुगु खः । सभामुखया कार्यकक्ष सिहदरवारय् जूगु सहलहलय् १४गते जुइगु प्रधानमन्त्री निर्वाचन व संसदया नियमावली संशोधनया बारे दलतय् बिचाः फ्वनादीगु खः ।
