प्रधानमन्त्री व सभामुखया ब्यागलं सहलह
येँ (सन्ध्या टाइम्स)/देशय् ब्वलनाच्वंगु राजनीतिक गतिरोध अन्त्य यायेगु निंतिं प्रधानमन्त्री माधवकुमार नेपालं वर्तमान सरकारय् दुथ्याःगु झिगू दलया नेतातय् मुँज्या सःतादीगु दु ।
उखे संविधानसभाया अध्यक्ष सुवासचन्द्र नेम्वाङं नं थौं हे ब्यागलं कथं संविधानसभाया मूमू न्हय्गू दलया शीर्ष नेतातय् बैठक सःतादीगु दु। प्रधानमन्त्री नेपालं म्हिगः हे सरकारय् दुथ्याःगु दलतय्त सःतादीगु खःसां नेपाली कांग्रेसया नेतातय् लिमलाःनि धाःगुलिं हाकनं थौं अथे बैठक सःतूगु खः ।
वय्कलं थौं सनिलय् सिंहदरवारय् थ्व बैठक सःतादीगु खः। उखे सभामुख नेम्वाङं धाःसा च्याक्वः तक नं प्रधानमन्त्रीया चुनाव जूसां प्रधानमन्त्री ल्यये मफुगु अले संविधान निर्माणया ज्या दिनाच्वंगु बारे सहलह ब्याकेत ततःधंगु न्हय्गू दलया नेतातय् ब्यागलं बैठक सःतादीगु खः ।
सिंहदरवारय् सनिलय् जुइगु उगु बैठकय् एकीकृत माओवादी, नेपाली कांग्रेस, एमाले, मधेशी जनअधिकार फोरम (लोकतान्त्रिक), तराई मधेश लोकतान्त्रिक पार्टी, मधेशी जनअधिकार फोरम व नेपाल सदभावना पार्टीया शीर्ष नेतातय्त सभामुख नेम्वाङं सःतादीगु खः ।
