थिमि नपाय् नं नेवाःतय् ज्ञापन पौ
थिमि (सन्ध्या टाइम्स)/नेवाः स्वायत्त राज्य मंकाः संघर्ष समिति मध्यपुर थिमि लागापाखें मध्यपुर थिमि नगरपालिका नेवाः स्वायत्त राज्यया अवधारणा कथं संचालन यायेमाल धकाः च्यागू सुत्रीय माग तयाः म्हिगः ज्ञापनपौ लःल्हाःगु दु ।
ज्ञापन पतिइ नेवाः संस्कृति संरक्षण व विकास यायेगु नितिं नगरपालिकापाखें माक्व बजेट तयेमाःगु, कर्मचारीतय्त नेवाःभाय् स्यनेमाःगु, न्हू कर्मचारी कायेगु इलय् नेवाःतय्त प्राथमिकता बीमाःगु, नगरपालिकाय् सम्पदा सम्बन्धि कवःया व्यवस्था यायेमाःगु, नेवाः डेस्क संचालन यायेमाःगु, नेपालभाषा व नेवाः लिपियात विज्ञापन बोर्ड, साइन बोर्डय् प्रयोग याःपिंत करय् छ्यापंया ब्यवस्था यायेमाःगु, नगरपालिकाया विज्ञापन नेपालभाषाया पत्रिकाय् नं बीमाःगु नापं थीथी कथंया माग तयातःगु दु ।
ज्ञापनपौ लःल्हाना कासें नगरपालिकाया कार्यकारी अधिकृत सकारात्मक जूगु नापं वइगु १५ गते नगरपालिकाया प्रतिनिधि, राजनीतिक संयन्त्र व मंकाः संघर्ष समितिया दथुइ वार्ता यायेगु बचं बियादीगु खः। ज्ञापनपत्र बीत दिलबहादुर श्रेष्ठ, मल्ल के. सुन्दर, सुजीव वज्राचार्य, कृष्णलाल गोजापिं झाःगु दु ।
