विविध साहित्य सम्मेलन चपाचोय्

थिमि (सन्ध्या टाइम्स)/विविध भाषा साहित्य समाजया ग्वसालय् थुगुसी झिंनिक्वःगु विविधभाषा साहित्य सम्मेलन मध्यपुर थिमिया चपाचो त्वालय् जुइगु जूगु दु। नेपाल संवतया न्हूदँ कुन्हु जुइगु उगु ज्याझ्वः ताःलाकेत दिलकृष्ण प्रजापतिया अध्यक्षताय् झिंनिक्वःगु विविधभाषा साहित्य सम्मेलन ग्वसाः खलः नीस्वंगु दु। ग्वसाः खलकं उकुन्हु सुथय् छ्वास त्वालं नसंचा उलेगु, न्हिनय् साहित्यिक ज्याझ्वः यायेगु व बहनी सांस्कृतिक ब्वज्या यायेगु क्वःछिउगु दु ।

भाषा, कला व संस्कृतिया विकास यायेगु ताः तयाः नीस्वंगु विविध भाषा साहित्य समाजं न्हूदँया लसताय् मध्यपुरया थीथी लागाय् साहित्य सम्मेलन याना वयाच्वंगु खः। सम्मेलन ताःलाकाः न्ह्याकेत प्रगतिशील साहित्य, सांस्कृतिक विधा व हापं बियाः ग्वाहालि यायेत सकसितं इनाप याःगु दु ।