पारसं सिन्हः तिना वन
येँ (सन्ध्या टाइम्स)/यँयाःया म्हिगः अन्तिम न्हि नानिचाः क्वचायेवं पुलांम्ह युवराज पारस शाह खुरुक्क वयाः कुमारीया ल्हातं सिन्हः तिनाः लिहां वन। राष्ट्रपति रामवरण यादव सिन्हः तिनाः लिहां वनेवं लिपा भाजु पारस नं अन थ्यंकः वःगु खः। शुरुइ ला पुलांम्ह जुजु ज्ञानेन्द्र शाह हे झाइगु खँ दुगु खः। लिपा पारस शाह जक झाल। वय्कलं कुमारीयात थः अबुयात भागि याकाहःगु असर्फी छानादीगु खः। वय्कः कुमारी छेँय् ताःई नं च्वनामदी ।
भाजु शाह अन थ्यनेवं अन मुनाच्वंपिं जुजुवादी कार्यकर्तातय्सं 'राजा आउ संस्कृति बचाउ,' 'जुजुयात पने दइ मखु' धकाः नाराबाजी तकं याःगु खः। अन पारसया सुरक्षा यायेत प्रहरी उलि मदुसां जुजुवादी कार्यकर्तातय्सं हे चेन दयेकाः वय्कःया सुरक्षा याःगु खःसा सुनां फोटो तकं खिचे याये मलाक वय्कःयात हथासं दुने यंकाः तुरुन्त हे पित हःगु खः ।
