बस फातापुलाः छम्ह सित, झिंनिम्ह घाःपाः
येँ (सन्ध्या टाइम्स)/पूर्वपश्चिम राजमार्ग अन्तर्गत बाराया पथलैया जंगलय् थौं सुथय् यात्रुबाहक बस फातापुलाः छम्ह जिथिम्ह सीगु दुसा मेपिं झिंनिम्ह घाःपाः जूगु दु ।
दुर्घटना जुयाः घटनास्थलय् हे सिन्धुली लामाटारया ७६ दँ दुम्ह भैरवमाया कार्की सीगु खः। येँनं सिन्धुलीपाखे वनाच्वंगु ना. ३ ख ५४९३ नम्बरया यात्रुबाहक बस थौं अनया दुधौरा खुसि लिकसं फातापुलाः दुर्घटना जूगु खँ प्रहरीं धाःगु दु। उगु दुर्घटनाय् लानाः धनबहादुर विक, रेशम राना, चन्द्रमाया कार्की, खुमबहादुर राना, प्रकाश केसी नापं मेमेपिं घाःपाः जूगु खःसा बसया चालक धाःसा बिसिउँ वंगु दु ।
थ्वहे दथुइ सुर्खेतय् दुर्घटनाय् लानाः छम्ह मिसा सीगु घटनायात कयाः क्षतिपूर्ति माग यासें आह्वान याःगु यातायात बन्दं थौं नं सुर्खेतया जनजीवन प्रभावित जूगु दु। म्हिगः उगु दुर्घटना जुइधंकाः अनिश्चितकालीन यातायात बन्द आह्वान याःगु खः ।
