नेवाः संघया निगू ज्याझ्वः
ख्वप (सन्ध्या टाइम्स)/नेपाल लोकतान्त्रिक नेवाः संघया संगठन विस्तारया झ्वलय् ख्वपया नंखेलय् नं गां पुचः नीस्वंगु दु। नंखेलय् जूगु छगू नेवाः मुनाया दथुइ उगु गां पुचः स्वंगु खः। पुचः नीस्वनेगु ज्याझ्वलय् मू पाहां कथं संघया केन्द्रीय नायः सानुराजा शाक्यं नेवाः प्रदेशया आवश्यकता व एमालेया बिचाःया बारे खँ कंगु खःसा संघया केन्द्रीय छ्याञ्जे कृष्णबहादुर घःजु, दुजःपिं माइलाबाबु द्यःला, महेन्द्रगोपाल श्रेष्ठ व संघया ख्वप कचाया कजि प्रदिप शाक्यपिंसं संघया क्रियाकलाप बारे खँ कनादीगु खः। नंखेलया प्रेमलाल कासुलाया सभापतित्वय् न्ह्याःगु उगु सभाय् नेकपा (एमाले) ख्वप जिल्ला कमिटीया दुजः अनिल श्रेष्ठपाखें नेवाःत न्ह्यःने वयेमाःगु खँय् बः बियादिल। उगु मुनां प्रेमलाल कासुलायात कजि, हेरामान सुकुभटुयात छ्याञ्जे व दुजलय् न्हुच्छे बहादुर थुथाजु, केशर सुकुभटु, बावुकाजी ब्यान्जु, लक्ष्मी सुकुभटु व कल्याण सुवालयात ल्यःगु खः ।
सिद्धिदासया १४३ क्वःगु बुदिंया लसताय् नेपाल लोकतान्त्रिक नेवाः संघ यल कचाःपाखें नेवाः प्रदेश बारे प्रशिक्षण ज्याझ्वः यात। संघया केन्द्रीय नायः सानुराजा शाक्यपाखें नेपालय् संघीय व्यवस्था व नेवाः प्रदेश, केन्द्रीय न्वकु हरिकृष्ण ब्यञ्जनकारपाखें नेपाल लोकतान्त्रिक नेवाः संघया नीति व कार्यक्रम नापं जातीय संगठनप्रति एमालेया दृष्टिकोण व केन्द्र्रीय दुजः नापं प्रशिक्षण विभागया कजि न्हुच्छेलाल महर्जनपाखें आइएलओ १६९ बारे दुग्यंक प्रशिक्षण बिउगु खः ।
