मतदाता नामावली मुंकेगु ज्याय् खनेदुगु समस्या चीकेत इनाप
निर्वाचन आयोगया कार्यवाहक प्रमुख नीलकण्ठ उप्रेतीं फोटो सहितया मतदाता नामावली मुंकेगु झ्वलय् खनेदुगु समस्या चीकेत दलतय् ध्यानाकर्षण याकादीगु दु । तराईया जिल्लाय् मधेसवादी दलतय्सं नामावली संकलनय् अवरोध थनेवं प्रमुख निर्वाचन आयुक्त उप्रेतीं दलतय्त थ्व समस्या समाधान यानाः अभियानयात सुचारु यायेत इनाप यानादीगु खः ।
थौ येँय् जूगु छगू साक्षात्कार ज्याझ्वलय् वय्कलं राजनीतिक व कानुनी समस्याया कारण तराईया छुंछुं जिल्लाय् यक्व मनूतय्सं नागरिकता मकाःगुलिं समस्या खनेदुगु धयादिल । चुनाव निष्पक्ष दयेकेगु ताः तयाः फोटोसहितया मतदाता नामावली संकलन अभियान न्ह्याकूगु स्पष्ट यानादिसें उप्रेतीं थुकीं चुनाव निष्पक्ष जुइगु दाबी नं यानादिल । वय्कलं थ्व फोटोसहितया मतदाता नामावली दुसाः मतदातां छुं नं कथंया ग्याचिकू व धम्की बिना थःगु इच्छा कथं मतदान यायेदइगु धयादिल ।
निवार्चन आयोगं दकलय् न्हापा ५८गू नगरपालिका व वयां लिपा झ्वःलाक ५६गू गाविस व १९गू हिमाली जिल्लाय् थ्व अभियान न्ह्याकीगु खँ धाःगु दु । थ्व पद्धतिलय् मतदाताया फोटोसहितया फिंगर प्रिन्ट दइगु व छम्ह मतदातां देय्या छुं नं छगू थासं छक्व जक मतदान यायेफइ । आयोगं जेठ तकया दुने दक्वं मतदाताया फोटो व फिंगर प्रिन्टसहितको नामवली मुंकेगु ताः तयाःगु दु ।
