दोषीयात कारवाही यायेत राष्ट्रपतियात ध्यानाकर्षण
हत्याया द्वपं लाःपिंत सर्वोच्च अदालतं दोषी ठहर याःसां नं अदालतया फैसलायात कार्यान्वयन मयाःगु धासें पिडित छेँजःपिंसं राष्ट्रपति डा. रामवरण यादवयात ध्यानाकर्षण पौ लःल्हाःगु दु ।
ओखलढुङ्गाया पोकली गाविस निवासी उज्जनकुमार श्रेष्ठया छेँजःलं थौं शितल निवास वनाः श्रेष्ठयात माओवादी जिल्ला नेता बालकृष्ण ढुंगेलं स्यानाब्यूगु धकाः अदालतं दोषी ठहर यायेधुंकूसां कारवाही मजूगु प्रति च्यूताः प्वंकूगु खः ।
ढुङ्गेलयात हत्याया अभियोगय् ओखलढुङ्गा जिल्ला अदालतं कर्तव्य ज्यान मुद्धाय् कसुरदार ठहर यानाः सर्वस्व नाप जन्मकैद फैसला न्यंकूगु खः । ओखलढुङ्गा जिल्ला अदालतं याःगु फैसलायात सर्वोच्च अदालतं २०६६ साल पौष १९ गते सदर याःगु खः । तर सर्वोच्च अदालतं याःगु फैसलायात नेपाल सरकारं आ तक नं कार्यान्वन मयाःगु कारणं सम्वन्धित निकायया ध्यानाकर्षण याकेत राष्ट्रपतियात ध्यानाकर्षण पौ लःल्हानाःगु खँ पिडितं धाःगु दु ।
श्रेष्ठयात २०५५ साल असार १० गते स्यानाब्यूगु खः । तर सर्वोच्च अदालतया निर्णय प्रति धासा माओवादीं असन्तुष्टी प्वंकुगु दु । सरकार व माओवादी दथुइ जूगु बिस्तृत शान्ति सम्झौताय् शान्ति सम्झौता न्ह्यः निगू पक्षया अभियोग खारेज यायेगु निर्णय जूगु धासें माओवादी असन्तुष्टि प्वंकाच्वंगु खः । माओवादीं शान्तिसम्झौता न्ह्यः जूगु घटनायात कया हत्याया द्वपनय् जन्मकैद यायेगु निर्णय विस्तृत शान्ति सम्झौताया उल्लङ्घन जूगु ठहर याःगु दु ।
