थीथी थासय् जूगु दुर्घटना १म्ह सित, १७म्ह घाःपाः
येँ नं सिन्धुली वनाच्वंगु यात्रुबहाक बस निजगढ पथलैया सतकखण्डया दुधरौ पुल न्ह्यने दुर्घटना जुयाः छम्ह सीगु दु । दुर्घटनाय् सिन्धुली लामटारया ८०दँ दुम्ह भैरव माया कार्की घटनास्थलय् सीगु खः ।
ना. २. ख. ५४९३ नम्बरया यात्रुबहाक बस तच्वय्क्क गति वयाच्वंगु कारणं अनियन्त्रित जुया दुर्घटना जुइवं झिंनिम्ह यात्रुत घाःपाः जूगु दु । घाःपाः जूपिंत नारायणी उप क्षेत्रीय अस्पताल बीरगंजय् वासःया निंतिं तयातगु दु । बसया चालक व सहचालक धाःसा बिस्यूवंगु दु ।
अथेहे गुल्मीया जैसिथोकय् थौं सुथय् जिप दुर्घटना जुइवं न्याम्ह घाःपाः जूगु दु । वाग्ला गाविसं सदरमुकाम तम्घास वनाच्वंगु लु. १. ज. १७४५ नम्बरया जिप जैसिथोक ९ सिमाहाघाटय् दुर्घटनाग्रस्त जूगु खः । ब्रेक फेला जुइवं गाडी दुर्घटनाग्रस्त जूगु खः । दुर्घटनाय् गाडी चालक देबेन्द्र भण्डारी, सहचालक मिठु जिसी, यात्रु दशरथ घिमीरे, जितेन्द्र थापा नाप न्याम्ह घाःपाः जूगु जिल्ला प्रहरी ज्याकू गुल्मीं धागु दु ।
