कांग्रेसयात सहमतिइ हयेत माओवादी-एमाले सक्रिय
येँ (सन्ध्या टाइम्स)/राष्ट्रिय सहमतिया माध्यमं न्हूगु सरकार दयेकेगु निंतिं कांग्रेसपाखें प्रधानमन्त्रीया उम्मेदवार जुयाच्वंम्ह रामचन्द्र पौडेलया नां लित कायेकेगु निंतिं एकीकृत माओवादी व एमालेया नेतात थनिंनिसें सक्रिय जूगु दु। माओवादी अध्यक्ष प्रचण्डं थौं प्रधानमन्त्री माधव नेपाल व मधेशी जनअधिकार फोरमया अध्यक्ष उपेन्द्र यादवयात ब्यागलं ब्यागलं नापलानाः सहलह ब्याकादीगु खः। वय्कःपिनि दथुइ कांग्रेसयात सहमतिइ हया देय्यात निकास बीगु खँय् सहलह जूगु खः। प्रचण्डं आः मेमेगु दलया नेतातय्त नं नापलानाः सहलह ब्याकादी धाःगु दु ।
थ्वहे दथुइ प्रधानमन्त्री माधव नेपालं सरकारय् दुथ्याःगु झिगू दलया बैठक थौं सःतादीगु दु। प्रधानमन्त्रीया ज्याकू सिंहदरवारय् थौं सनिलय् च्वनीगु उगु बैठकय् लिपांगु इलय् नेपाःया राजनीतिइ ब्वलंगु समस्यायात कयाः सहलह ब्याकेत नापं राष्ट्रिय सहमतिया लकस ब्वलंकेगु खँय् सहलह जुइ धाःगु दु ।
च्याक्वः तक जूगु चुनावपाखें नं बहुमत हये मफयाः प्रधानमन्त्री ल्यये मफुगु नापं प्रधानमन्त्रीया उम्मेदवार प्रचण्डं नां लित कायेधुंकाः आः गुकथं न्ह्याः वनेमाली धकाः सुझाव कायेगु निंतिं थौं प्रधानमन्त्री नेपालं बैठक सःतादीगु खः ।
