रामचन्द्रयात निर्विरोध घोषणा याकेगु दाउ
येँ (सन्ध्या टाइम्स)/व्यवस्थापिका संसदय् आः थःगु पार्टीया छम्ह हे जक प्रधानमन्त्रीया उम्मेदवार कथं ल्यनाच्वंगु कारणं वयात हे निर्विरोध रुपं प्रधानमन्त्री घोषणा याकेगु दाउ कांग्रेसं स्वयाच्वंगु खँ सीदुगु दु। मैदानय् याकःचा जक उम्मेदवार दुगु कारणं वयात हे निर्वाचित यायेमाः धइगु कानुनी दाउ कांग्रेसं मालाच्वंगु खँ नं धाःगु दु ।
संसदया कार्यव्यवस्था परामर्श समितिया म्हिगः जूगु बैठकय् कांग्रेसया नेतातय्सं उकथं खँ तःगु खः। थःगु पार्टीया नेता रामचन्द्र पौडेल छम्ह जक उम्मेदवार ल्यंगु अवस्थाय् संसदया कार्य संचालन नियमावली कथं निर्विरोध घोषणा यायेमाःगु माग कांग्रेसं तःगु खः ।
'निर्विरोध यायेगु कानुनी व्यवस्था नं दु'
जातीय आधारय् संघीयताया विरोधी संविधानविद् भिमार्जुन आचार्यं प्रधानमन्त्रीया छम्ह जक उम्मेदवार रामचन्द्र पौडेल जूगुलिं वय्कः निर्विरोध जुइगु कानुनी ब्यवस्था दु धकाः दावी यानादीगु दु। येँय् थौं ग्वसाः ग्वःगु छगू ज्याझ्वलय् न्ववासें वय्कलं व्यवस्थापिका संसदया कार्य संचालन नियमावलीया नियम ७ या उपनियम ८ य् छम्ह जक उम्मेदवार जूगु अवस्थाय् निर्विरोध जूगु दावी याये फइगु प्रावधान दु धयादिल। तर उगु नियमया ब्याख्या यायेगु अधिकार धाःसा सभामुखयाके जक दुगु खँ नं वय्कलं कनादिल ।
