महाकविया बुन्हिया थीथी ज्याझ्वः
येँ (सन्ध्या टाइम्स)/महाकवि सिद्धिदास महाजुया १४३ क्वःगु बुन्हि थीथी ज्याझ्वः यासें हन। थ्व लसताय् शनिवाः सुथय् येँया केलत्वालं नेपालभाषाया साहित्यकार, भाषासेवीपिं मुनाः नसंचा उलेगु ज्याझ्वः जुल ।
सिद्धिदासया नामय् च्वयातःगु ब्याहांचुलि म्येँ हालाः उगु वय्कःया किपा ब्वयाः उगु नसंचा उलेगु ज्याझ्वः जूगु दु। केलत्वालं शुरु जुयाः कुमारीया रथ चाःहीकीगु थःने व क्वःने लागा चाःहिलाः केलत्वालय् तुं थ्यंकाः ज्याझ्वः क्वचायेकूगु खः ।
थ्वहे लसताय् उखे ख्वपय् नं छगू ज्याझ्वः यात। सिद्धिदास माध्यामिक ब्वनेकुथिं न्यायेकूगु उगु ज्यझ्वःया मूपाहां व्याकरणविद्, भाषाजवाः रमापतिराज शर्मा जुयादीगु खःसा पाहां कथं वरिष्ठ साहित्यकारपिं तिलक प्रकाश, कवि पूर्ण बैद्य, कवि योगेन्द्र प्रधान, भाषासेवी रत्नगोपाल साँय्जु, कवि त्रिरत्न शाक्य, नारायणभक्त बाटी, बाखंमि कृष्णभक्त बोडे आदिपिंसं ब्वति कयादीगु खः ।
'सिद्धि रामायणं' लोकं ह्वायेफुम्ह महाकवि सिद्धिदास महाजुं थनिं १०० दँ न्ह्यः कयादीगु 'भाषा म्वाःसा जाति म्वाइ', 'मूर्ति पूजा यातले झी थहां वने फइ मखु', 'काय व म्ह्याय् बराबर खः' धइगु धापूत गुलि दूरगामी व वैचारिक परिपक्वताया दसु खः धइगु खँ थौं वयाः पुष्टि जुयाच्वंगु दु। भाषासेवी नरेन्द्रभक्त हाडा नायः जुयादीगु उगु ज्याझ्वलय् लसकुस न्वचु गणेश शिल्पकारं बियादीगु खः।
थ्वहे लसताय् शनिवाः येँया दगु बहालय् कविता वाचन ज्याझ्वः जुइत्यंगु दु ।
