सिक्किमय् यँयाः

थुगुसीया यँयाः जात्रा नेपालय् जक मखु नेपालं पिने सिक्किमय् नं न्यायेकल। अन यँयाः धकाः खास यानाः कुमारीया खः दयेकाः साला हसें समारोह याःगु खः।

सिक्किम नेवाः गुथिया ग्वसालय् उगु ज्याझ्वः याःगु खः। इन्द्रजात्रा समारोह समिति हे गठन यानाः अन उगु ज्याझ्वः न्ह्याकूगु खः। सिक्किमया राजधानी गान्तोकया भाजु उद्यान धइगु थासं अन कुमारीया खः सालेगु शुरु जूगु खः। उगु ज्याझ्वलय् मू पाहां कथं पुलांम्ह मुख्यमन्त्री व योजना आयोगया वर्तमान उपअध्यक्ष सन्चमान लिम्बु झाःगु खः। लिसें मन्त्री एन. के. प्रधान लगायत मेमेपिं नं आपालं दुजःतय्सं उकी ब्वति काःगु खः ।

यात्रा शुरु याये न्ह्यः पुजारी श्रीश्री सूर्यवीरं तान्त्रिक विधिपाखें पुजा यानाः सकसितं सिन्हः तिकादीगु खः। वयां लिपा अनं तुं खः सालाः बजाः चाःहीकेगु ज्या जुल। उगु कुमारी खःयात गान्तोक भानु उद्यानंनिसें जिरो प्वाइन्ट, विधायक आवास भवन जुयाः एमजी मार्गया पर्यटन सूचना केन्द्र थ्यंकाः लाखे प्याखं हुइकाः क्यंगु खः।

वयां लिपा यात्रा हानं न्ह्याकाः भानु उद्यानय् तुं थ्यंकाः छगू 'इन्द्रभोज'या ग्वसाः ग्वसें क्वचायेकूगु खः। उगु भ्वजय् करिब स्वद्वः मनुखं ब्वति काःगु खः ।

अनंलि बहनी हानं सांस्कृतिक ज्याझ्वः नं जुल। उकी नेवाः लगायत थीथी जातिया हुलाप्याखं न्ह्यब्वयेगु ज्या जूगु खः। उगु सांस्कृतिक ज्याझ्वलय् मूपाहां कथं सिक्किमया मुख्यमन्त्री पवन चामलिङ्ग लिसें विधानसभाया अध्यक्ष केटी ग्याल्छेन नं झाःगु खः। अथे हे सिक्किम नगरपालिकाया मेयर लगायत थीथी मन्त्रालय अन्तर्गतया थीथी विभागया प्रमुखतय्सं ब्वति काःगु खः। मुख्यमन्त्री चामलिङ्गं अन तयातःम्ह कुमारी माजुया किपाय् वहःया पाँय्म्वः छानादीगु खः। संयोगवश वकुन्हु हे मुख्यमन्त्री चामलिङ्गया बुन्हि नं लानाच्वन। उकिं वय्कःयात अन हे नेवाः परम्परा कथं बुन्हि न्यायेगु ज्या नं जुल ।

सिक्किमय् थ्व कुमारी सालेगु ज्याझ्वः येँय् क्वःनेयाः जू कुन्हु याःगु खः। अन साःगु खतय् दुने कुमारीया रंगीन किपा तयातःगु खः ।

ज्याझ्वःया किपाया लागि थन क्लिक यानादिसँ

More Stories Like this