प्रम ल्ययेगु कानुनी निकास बारे कानुन व्यवसायीत विभाजित
व्यवस्थापिका संसद्पाखें प्रधानमन्त्री ल्ययेमफुगु बारे कानुनी निकासया बारे कानुन व्यवसायीतय्सं बिस्कं बिस्कं बिचाः प्वंकूगु दु ।
सोमवाः येँय् जूगु छगू साक्षात्कार ज्याझ्वलय् कानुन व्यवसायी टीकाराम भट्टराईं दलत दथुइया सहमतिलय् आःया प्रक्रिया क्वचायेकाः मेगू प्रक्रियाय् वनाः निमावली संशोधन यायेमाःगु वा सभामुखं रुलिङ यानाः जुसां निमावली हिलेमाःगु निगू विकल्प छ्यला निकास मालेमाःगु धयादिल ।
अधिवक्ता शेरबहादुर केसीले सभामुखनाप संसद्य् कडा रुपमा प्रस्तुत जुयाः उम्मेद्वारयात उम्मेद्वारी लितकायेकेगु अधिकार दुगु धयादिल । वय्कलं सरकार व संविधान बीमफुगु संसद् विघटन यायेमाःगु धयादिसें दलत दथुइया सहमतिलय् याकचा दुम्ह उम्मेद्वार रामचन्द्र पौडेलयात हे प्रधानमन्त्री दयेके नं फइगु बिचाः प्वंकादिल ।
तर अधिवक्ता भीमार्जुन आचार्यं धाःसा सभामुखं जवरजस्ती उम्मेद्वारयात उम्मेद्वारी लितकायेकेगु कानुनी व्यवस्था मदुगु धयादिल । संविधानविद् आचार्यं संसद्य् याकचा उम्मेदवार कथं दुम्ह रामचन्द्र पौडेलं थःयात निर्विरोध त्याकेत संसद्य प्रस्ताव यायेफइगु कानुनी व्यवस्था दुगु स्पष्ट यानादिल ।
नेपाल बार एसोसिएसनया अध्यक्ष प्रेमबहादुर खड्कां सरकार निर्माणया निंतिं जनतां दलतय्त दवाव बीमाःगु धयादिल ।
