'याकचा चुनावी दौडय् ब्वति कायेगुया छुं औचित्य मदु'
एकीकृत नेकपा (माओवादी)या उपाध्यक्ष डा. बाबुराम भट्टराईं बहुमत दुजःत विपक्षय् दुगु इलय् कांग्रेसया उम्मेद्वार याकचा चुनावी दौडय् ब्वति कायेगुया छुं औचित्य मदुगु खँ धयादीगु दु ।
पत्रकार प्रशान्त झाया अबुया स्वास्थ्य स्थिति सीकेत सोमवाः नर्भिक अस्पताल थ्यंकादीम्ह उपाध्यक्ष भट्टराईं बहुमत दुजःतय्सं ब्वति मकाइगु चुनावी प्रकि्रयालय् हे च्वनेगु कांग्रेसया प्रवृति हास्यास्पद जूगु धयादिल । वय्कलं कांग्रेसं उम्मेद्वारी लितकयाः राष्ट्रिय सहमतिया सरकारया निंतिं वाधक जुसाः कांग्रेसया राजनिति हे सिधइगु दावी यानादिल ।
उपाध्यक्ष भट्टराईं राष्ट्रिय सहमतिया निंतिं आः कांग्रेसं उम्मेद्वारी लितकाइगु विश्वास प्वंकादिल । दलत दथुइ सहमतिपाखें राष्ट्रिय सहमतिया सरकार गठन यानाः शान्ति व संविधान सुनिश्चित यायेमाःगु माओवादीया स्पष्ट रणनिति दुगु उपाध्यक्ष भट्टराईं धयादिल ।
वय्कलं नर्भिकय् न्यान्हु न्ह्यः निसें वासः याकाच्वंम्ह कांग्रेसया संस्थापक नेता कृष्णप्रसाद भट्टराईया नं स्वास्थ्य अवस्था बारे न्यनेकने यानादीगु खः ।
