प्रचण्डं प्रम व यादव नाप खँल्हाबंला
प्रधानमन्त्री माधवकुमार नेपाल व एनेकपा (माओवादी)या अध्यक्ष पुष्पकमल दाहाल 'प्रचण्ड' दथुइ सेना समायोजन व शान्ति प्रकृयाया बारे खँल्हाबंला जूगु दु ।
सोमवाः सुथय् प्रधानमन्त्री निवास बालुवाटारय् जूगु खँल्हाबंलाय् सेना समायोजन व पुनर्स्थापनाया ज्यायात आः गुकथं न्ह्याकेगु बारे सहलह जूगु खः । अथेहे निम्ह नेतात दथुइ याकनं सेना समायोजन क्वचायेकाः शान्ति प्रकृयायात निष्कर्षय् थ्यंकेमाःगु विषयसं खँल्हाबंला जूगु खः ।
खँल्हाबंलाया झ्वलय् राजनीतिक गतिरोध ताःहाक जुयाः बजेट तकं ह्येमफुया देशय् आर्थिक संकटय् वइगु सम्भावना दुगुलिं बजेट ह्येगु निंतिं ग्वाहालि यायेत प्रधानमन्त्री नेपालं प्रचण्डयात इनाप यानादीगु खः । प्रचण्डं राजनीतिक गतिरोध याकनं क्वचायेकेत कांग्रेस नेता रामचन्द्र पौडेलयात उम्मेदवारी लितकायेत इनाप यायेत प्रधानमन्त्रीयात सुझाव बियादीगु खः ।
थौं हे माओवादी अध्यक्ष प्रचण्डं मधेशी जनअधिकार फोरम नेपालया अध्यक्ष उपेन्द्र यादव नाप नं राजनीतिक गतिरोधया बारे खँल्हाबंला यानादीगु दु । प्रचण्ड निवास न्हू बजारय् जूगु खँल्हाबंलाय् राष्ट्रिय सहमति निमार्ण यायेत ग्वाहालि यायेत प्रचण्डं फोरम अध्यक्ष यादवयात इनाप यानादीगु खः ।
