टोखाय् नेवाः जागरणया प्रशिक्षण
येँ (सन्ध्या टाइम्स)/नेवाः जागरण मञ्च टोखा कचाया ग्वसालय् म्हिगः टोखाया चण्डेश्वरीइ प्रशिक्षण व सदस्यता इनेज्या जुल। ज्याझ्वलय् मञ्चया संयोजक सुजीब बज्राचार्यं नेवाः जागरण मञ्च नेवाःतय्त संगठित यायेगु आज्जु ज्वनाः सदस्यता इनेगु ज्याझ्वः न्ह्याकाच्वंगु खँ तयादिसें टोखाय् च्वंपिं फुक्क नेवाःतय्त नेवाः हकहित संरक्षित यायेत संगठित जुइत इनाप यानादिल ।
मूपाहां कथं झाःम्ह सल्लाहकार लक्ष्मण राजवंशीं नेवाःत इलय् हे संगठित मजुल धाःसा तसकं लिउने लाइगु खँ न्ह्यथँसें नेवाःतय्के राजनीतिक जागरण हयेगु नितिं नं नेवाः जागरण मञ्च न्ह्यानाच्वंगु बिचाः प्वंकादिल।
सछिं मल्याक टोखाया थीथी राजनीतिक पार्टीया कार्यकर्ता, थीथी क्लब व संघसंस्थाया प्रतिनिधि मुंगु उगु ज्याझ्वलय् मञ्चया सदस्यता वितरण फर्म इनेज्या याःगु खः ।
अथेहे ज्याझ्वलय् जागरण मञ्च टोखाया ग्वसालय् इलेक्ट्रिक तालिमय् ब्वति काःपिंत मञ्चया शिपमुलक समितिया संयोजक सूर्य श्रेष्ठं दसिपौ लःल्हानादीगु खःसा कोषाध्यक्ष अमृत ताम्राकारं प्रशिक्षक ऋषि मास्के व राजु महर्जनयात दसिपौयालिसें आथिंक ग्वाहालि लःल्हाःगु खः। ज्याझ्वलय् टोखा कचाया प्रमुख कृतन श्रेष्ठं लसकुस यानादीगु खः ।
