च्याक्वःगु खुसिइ नं पौडेल बुत
प्रधानमन्त्रीया चुनाव अन्तर्गत आइतवाः जूगु च्याक्वःगु चरणया चुनावय् नं नेपाली कांग्रेसया उम्मेदवार रामचन्द्र पौडेल बूगु दु । एनेकपा (माओवादी)या अध्यक्ष पुष्पकमल दाहाल 'प्रचण्डं' थःगु उम्मेदवारी लितकायेवं चुनावी दौडय् याकचा जुयादीम्ह पौडेल थौं जूगु च्याक्वःगु खुसिया प्रधानमन्त्री निर्वाचनय् नं बुइ माःगु खः ।
थौं जूगु निर्वाचनय् कुल उपस्थित १८९ सभासद्त पाखें पौडेलया पक्षय् ११६, विपक्षय् २ व तटस्थ ७१ मत लाःगु खः । न्हय्क्वः तकया चुनावय् थें नेकपा (एमाले) व मधेशी मोर्चा तटस्थ च्वंगु खः ।
माओवादीं धाःसा थःगु उम्मेदवारी लितकायेवं बैठक स्थलं पिहावंगु खः । थ्वस्वयां न्ह्यः प्रचण्डयात प्रधानमन्त्रीलय् निर्वाचित याः धइगु प्रस्तावया प्रस्तावक डा. बाबुराम भट्टराईं वय्कया उम्मेदवारी लितकायेत संसदय् प्रस्ताव पेश यानादीगु खः । वय्कया प्रस्ताव संसदपाखें सर्वसम्मतिं पारित जूगु खः ।
माओवादीं उम्मेदवारी लितकासें कांग्रेसयात नं सहमतिय प्रणाली पाखें न्ह्याः वनेत उम्मेदवारी लितकायेत इनाप याःगु दु । तर कांग्रेसं धाःसा सहमतिया स्पष्ट खाका तयार मजुइकं उम्मेदवारी लितमकायेगु अडान काःगु दु ।
आः संसदया गुक्वःगु चरणया चुनाव असोज १४ गते बिहीवाः जुइ ।
