गोलीं कयेकाः स्वंगू लाख लुटे यात
येँ (सन्ध्या टाइम्स)/थनया रक्तकाली द्यःया च्वय् बुरांख्यः वनेगु लँय्सं थौं गोली समेत कयेकाः स्वंगू लाख तका दां लुटे याःगु दु ।
बैंकं ध्यबा कयाः लिहां वयाच्वंम्ह लक्ष्मीनारायण श्रेष्ठयात मोटरसाइकल गया वःपिं निम्ह मनूतय्सं लुटे याःगु खः। ह्याउँगु रंगया मोटरसाइकल गया वःपिं निम्ह मनूतय्सं श्रेष्ठं ज्वना वःगु ध्यबा दुगु ब्याग लाकाः बिसिउँ वंगु खः। उमिसं ब्याग लाका काःबलय् श्रेष्ठया ल्हातय् घाः नं लाःगु खः ।
श्रेष्ठं प्रहरीयात धाः कथं लुटेरातय्सं ब्याग लुटे याना खतं फसय् गोली प्रहार याःगु खः। उमिसं निगू राउण्ड हवाई फायर याःगु खःसा मेगु छगः गोली अन हे कुतुं वंगु खः। प्रहरीं कुतुं वंगु गोली कया यंकूगु दु। श्रेष्ठया ब्यागय् स्वंगू लाख तका दां दुगु खँ धाःगु दु। उमिसं श्रेष्ठयात बैंकं पिहां वसांनिसें पीछा याना वःगु अनुमान दु। मोटरसाइकलया नम्बर स्थानीय मनूतय्सं टिपे याना तःगु खःसां निम्हेस्यां टिपे यानातःगु नम्बर निगू हे लानाः अन्यौल जुयाच्वंगु दु। उगु थासय् न्हापा नं थथे हे लखौं तका लुटपाट जुइधुंकूगु दु ।
