नेवाः लोककला बारे गोष्ठी
किपू (सन्ध्या टाइम्स)/लोकसाहित्य परिषदया ग्वसालय् नेवाः लोक साहित्य विषयसं छगू गोष्ठी जुल। नेपालभाषा केन्द्रीय विभागया प्रमुख लिसें लोकसाहित्य परिषद्या प्रमुख प्रा. प्रेमशान्ति तुलाधरया सभापतित्वय् न्ह्याःगु उगु गोष्ठीया उलेज्या संस्कृतिविद् सत्यमोहन जोशीं यानादीगु खः ।
ज्याझ्वलय् शारदा चित्रकारं 'पुँज्या नेवाः लोक कला म्हसीका' या बारे ज्यापौ न्ह्यब्वयादीगु खः। उगु ज्यापौया टिप्पणी अमिरमान चित्रकारं यानादीगु खः। अथे हे 'नेपाःया परम्परागत चित्रकला 'पौभाः' नांगु ज्यापौ लोक चित्रकारं न्ह्यब्वयादीगु खःसा उकी मदन चित्रकारं टिप्पणी यानादीगु खः। टिप्पणी यासें मदन चित्रकारं लोक चित्रकलाया तःधंगु महत्व दयां नं थुकिया विकास जुइ मफयाच्वंगु खँ धासें सकसिनं थःगु लोक चित्रकलाया बारे थुइकेमाःगु व उकिया संरक्षण यायेमाःगु बिचाः प्वंकादिल ।
ज्याझ्वलय् छ्याञ्जे लक्ष्मीशोभा शाक्यं वार्षिक प्रतिवेदन न्ह्यब्वयादीगु खःसा दांभरि बासुदेव श्रेष्ठं आर्थिक प्रतिवेदन न्ह्यब्वयादीगु खः। ज्याझ्वःया न्हापांगु ब्वय् पुलांगु ज्यासना पुचः भंग यानाः न्हूगु ज्यासना पुचः ल्ययेगु ज्या नं जूगु खः। न्हूगु ज्यासना पुचलय् छसिकथं नायः प्रा. प्रेमशान्ति तुलाधर, न्वकु आनन्दकृष्ण कर्माचार्य व वीरसिंह महर्जन, छ्याञ्जे राजितबहादुर श्रेष्ठ, लिउ छ्याञ्जे इश्वरीमैंया श्रेष्ठ, दांभरि बासुदेव श्रेष्ठ, लिउ दांभरि तिमिला रंजित व दुजलय् काजीमान डंगोल, लक्ष्मीशोभा शाक्य, निर्मला श्रेष्ठ व दिलिप जोशीपिं सर्वसम्मतं ल्यःगु खः ।
