लँ दयेकेगु माग यानाः यातायात हडताल
येँ (सन्ध्या टाइम्स)/बाराया यातायात व्यवसायीतय्सं थनिंनिसें सार्वजनिक बस बन्द याःगु दु। वा वयाः स्यंगु गां लागाया लँ दयेकेत सम्बन्धित निकायपाखें कुतः मयाःगु विरोधय् बस व्यवसायीतय्सं थनिंनिसें बस संचालन बन्द याःगु खः ।
बस व्यवसायीतय्गु हडतालया कारणं बाराया सदरमुकाम कलैयापाखें बीरगन्ज, निजगढ, सिम्रौनगढ, कबही गोठ, मधुवन नापं थाय्थासय् वनीगु रुटया बस थौं सुथंनिसें संचालन मजुयाः सर्वसाधारणयात समस्या जूगु दु ।
आन्दोलनरत बस व्यवसायी व मजदूरतय्सं थाय्थासय् बस बेथां निकाः लँय् पंगः थनाबिउगुलिं मेमेगु यातायात नं संचालन मजुयाच्वंगु दु। गां लागाया लँ स्यनाः गाडी हे चले याये मफइगु अवस्था जुयाः बाध्यतावस यातायात हडताल यायेमाःगु खः खँ यातायात ब्यवसायीतय्सं धाःगु दु।
अनिश्चितकाल बन्दया ख्याच्वः
उखे बसचालक वकिल बुढाथोकीयात स्याःम्ह मनूयात कारवाही यायेमाःगु व क्षतिपूर्ति बीमाःगु माग यासें यातायात व्यवसायीतय्सं थौं नं सुदरपश्चिमय् यातायात बन्द याना बिउगु दु। म्हिगःनिसें यातायात बन्द यानाच्वंपिं मजदुरतय्सं यातायात साधनत बेथां दिकातःगुलिं सार्वजनिक यातायात जक मखु दमकल, एम्बुलेन्स तकं बन्द जुयाच्वंगु दु। बन्दं यानाः राप्ती, भेरी, कर्णाली, सेती व महाकालीया जनजीवन प्रभावित जूगु दु। थःपिनि माग पूरा मजुल धाःसा असोज १४ गतेनिसें अनिश्चितकालीन यातायात बन्द यायेगु ख्याच्वः मजदूर संगठनतय्सं बिउगु दु ।
