स्पष्टिकरणयात थप अध्ययन यायेत माओवादीया इनाप
एकीकृत नेकपा (माओवादी)या बुधवाः सुथय् च्वंगु सचिवाल बैठकं प्रधानसेनापति रुकमांग कटुवालं ब्यूगु स्पष्टिकरणबारे थप अध्ययन यानाः जक कारवाही प्रकृया न्ह्याकेत सरकारयात सुझाव ब्यूगु दु ।
बैठकं स्पष्टिकरणया समबन्धय् छुं दिं अध्ययन यायेमाःगु निष्कर्ष पिकाःगु खः । स्पष्टिकरण सम्बन्धी थप छुन्हु-निन्हु अध्ययन यानाः जक पलाः ल्ह्वनेत सरकारयात सुझाव बियागु खँ सचिवालय दुजः सीपि गजुरेलं जानकारी बियादिल । वयेकलं भारत, अमेरिका लगायतया अन्तराष्ट्रिय शक्ति व सहकर्मी दलपाखें तकं दवाब वःगुलिं थप सहलह यनाः जक न्ह्याः वनेगु निर्णय जूगु खँ धयादिल ।
थ्वस्वया न्ह्यः मंगलवाः च्वंगु सचिवालयया बैठकं स्पष्टिकरण चित्त बुझेमजूसाः तत्काल कारबाही यायेत सरकारयात निर्देशन ब्यूगु खः ।
अथेहे माओवादीं राष्ट्रपति डा. रामवरण यादवं संवैधानिक परिधी दुने च्वनाः जक ज्या यायेत सुझाव ब्यूगु दु । सरकारयात अनावश्यक सुझाव बिया राष्ट्रपति यादव कार्यकारी जुइत स्वःगु निर्णय बैठकं पिकाःगु जानकारी मेम्ह सचिवालय दुजः टोपबहादुर राइमाझीं बियादिल । माओवादीं नागरिक सर्वोच्चताया निंतिं देय्यंक प्रदर्शन यायेगु नं निर्णय याःगु दु ।
