प्रचण्डया उम्मेदवारी लितकायेगु माओवादी निर्णय

एकीकृत नेकपा (माओवादीं) प्रधानमन्त्रीया निंतिं आइतवाः जुइगु च्याक्वःगु निर्वाचन स्वयां न्ह्यः उम्मेदवारी लितकाइगु जूगु दु । आइतवाः सुथय् पार्टी अध्यक्ष पुष्पकमल दाहाल 'प्रचण्ड'या न्हू बजार स्थित छेँय् च्वंगु पदाधिकरीतय् बैठकं उम्मेदवारी लितकायेगु निर्णय याःगु खः ।

माओवादीं न्हय्क्वः तक जूगु निर्वाचन पाखें नं प्रधानमन्त्री ल्ययेमफयाः औचित्यकहिन जूगु प्रधानमन्त्रीया निर्वाचान पाखें उम्मेदवारी लितकायेगु व निर्वाचनय् नं ब्वति मकायेगु निर्णय याःगु खः । प्रधानमन्त्रीया उम्मेदवारया प्रस्तावक उपाध्यक्ष डा. बाबुराम भट्टराईं थौं उम्मेदवारी लितकायेगु प्रस्ताव पेश याइगु खँ धाःगु खः ।

अथेहे माओवादी बैठकं कात्तिक ६ गते निसें चितवनय् च्वनीगु धाःगु बिस्तारित बैठकया थाय् व मिति हिलाः कात्तिक १२ गते गोरखाय् च्वनीगु निर्णय याःगु दु ।