स्पष्टिकरण विवाद बारे राष्ट्रपति-प्रधानमन्त्री खँल्हाबंला
सरकारं प्रधानसेनापति याके काःगु स्पष्टिकरणया बारे राजनीतिक ख्यलय् विवाद अप्वेवं प्रधानमन्त्री पुष्पकमल दाहाल प्रचण्डं बुधावाः सुथय् राष्ट्रपति डा. रामवरण यादवनाप सहलह यानादीत राष्ट्रपति निवास थ्यंकादीगु खः ।
राष्ट्रपति यादवनाप सहलह यानादीधुकां संचारकर्मीत नाप खँल्हानादिसें प्रधानमन्त्री प्रचण्डं राष्ट्रपतिं दक्वं पार्टीया सहमति कथं ज्या यायेत सुझाव बियादीगु खँ कनादिल । लिसःलय् वयेकं थम्हं दक्व पार्टी नाप सहलह यायेगु बंचः बियाःगु जानकारी बियादिल ।
राष्ट्रपति नापलाना वयेवं प्रधानमन्त्रीं माओवादी पार्टी सचिवालयया बैठक सःतुगु दु । अथेहे छुं लिपाः मन्त्रीपरिषदया बैठकय् च्वनीगु जूगु दु ।
थ्वस्वयां न्ह्यः मंगलवाः राष्ट्रपति डा. रामवरण यादवं सैनिक ऐन संशोधन मयासें नेपाली सेनाया प्रमुखयात चीकेगु ज्या संविधान व कानुनसम्मत मजुइगु सुझाव प्रधानमन्त्रीयात ब्यूगु खः ।
