आत्मसमर्पण यायेत शान्ति प्रकृयाय् वयाःगु मखु : भट्टराई

एकीकृत नेकपा (माओवादीं)या उपाध्यक्ष डा. बाबुराम भट्टराईं थःपिं सुं नाप नं आत्मसमर्पण यायेत शान्ति प्रकृयाय् मवयाःगु खँ धयादीगु दु ।

स्वंगूगु हायत रिजेन्सी रनिङ शिल्ड मिजं भलिवलया शनिवाः येँय् उलेज्या यानादिसें भट्टराईं थःपिं शान्ति, संविधान व ह्यूपाःया निंतिं शान्ति प्रकृयाय् वयागु धयादिल । शान्ति व संविधान संस्थागत यायेत माओवादीं आन्दोलन मदीकूगु धयादिसें वय्कलं आन्दोलनया स्वरुप जक हिलागु धयादिल । वय्कलं उपलब्धीत संस्थागत यायेत माःसा तःधंगु संघर्ष यायेगु ख्याच्वः नं बियादिल ।

नेता भट्टराईं वर्तमान गतिरोध ज्यंकेत सहमति आवश्यक जूगु धयादिसें कांग्रेसं प्रधानमन्त्रीया उम्मेदवारी लितमकासें गतिरोध ताःहाकेत स्वयाच्वंगु द्वपं बियादिल ।