मधेशवादी दलत हानं तटस्थ च्वनीगु

न्हय्क्वःगु खुसिया चुनावय् तक तटस्थ च्वनावःगु मंकाः लोकतान्त्रिक मोर्चाय् आवद्ध दुगु मधेशवादी दलत च्याक्वःगु चरणया निर्वाचनय् नं तटस्थ च्वनीगु जूगु दु ।

शनिवाः मधेशी जनअधिकार फोरम लोकतान्त्रिकया संसदीय दलया ज्याकूथी च्वंगु बैठकं हानं मेगू चरणया निर्वाचनय् नं तटस्थ हे च्वनीगु निर्णय याःगु खः । मोर्चां शान्ति व संविधानया सम्बन्धय् न्हापा जूगु सम्झौता पूर्णरुपं कार्यान्वयन मजुइकं राष्ट्रिय सहमति जुइमफइगु धासें तटस्थ हे च्वनीगु निर्णय याःगु खः ।

अथेहे मोर्चाया दुजः दलतय्सं माओवादीं भारतीय लगानीया जलविद्युत परियोजनात संचालन जुइमबीगु निर्णया प्रति आपत्ति प्वंकूगु दु । बैठकय् फोरम लोकतान्त्रिक, तराई मधेश लोकतान्त्रिक पार्टी व सद्भावनाया ब्वति दुगु खःसां मधेशी जनअधिकार फोरम नेपालया धाःसा ब्वति मकाः ।