कार्यवाहक अध्यक्षया लोभ मदु: प्रधानमन्त्री
येँ (सन्ध्या टाइम्स)/ प्रधानमन्त्री माधव कुमार नेपालं थःत नेकपा (एमाले)या कार्यवाहक अध्यक्ष जुइगु प्रस्ताव वल धकाः जुयाच्वंगु हल्ला वास्तवय् सत्य मखु धयादीगु दु ।
एमालेया वरिष्ठ नेता तकं जुयादीम्ह वय्कलं कार्यबाहक अध्यक्ष जुइगु उद्देश्यं माओवादी व एमालेया दथुइ सहमति याकूगु धइगु आशंका थम्हं नं न्यानागु दु धयादिल ।
थौं सुथय् वीरगन्जया होटल भिस्वाय् थौं सुथय् एमालेया पर्सा क्षेत्र नं. १ या न्हूपिं पदाधिकारीतय्त सपथ ग्रहण ज्याझ्वः धुंकाः कार्यकर्ता व संचारकर्मीतय्गु दथुइ न्ववायेगु झ्वलय् प्रधानमन्त्री नेपालं अथे धयादीगु खः। वय्कलं धयादिल, 'जितः एमालेया कार्यवाहक अध्यक्ष बाय् मेगु छुं नं पदया लोभ मदु, सुनानं शंका मयाःसां जिउ ।'
प्रधानमन्त्री नेपालं एकीकृत माओवादी व एमालेया दथुइ नकतिनि जक प्रधानमन्त्री निर्वाचन प्रक्रियायात आःया अवस्थाय् अन्त्य यानाः न्हूगु कथं वनेगु धकाः जूगु सहमतियात कयाः नेपाली कांग्रेसय् ब्वलंगु आशंकाप्रति टिप्पणी यानादिसें न्हूगु संविधान दयेके मफुतले बाम धुबीकरण संभव मदु धकाः दावी नं यानादिल। वय्कलं धयादिल, 'न्हूगु संविधान दयेके मफुतले लेफ्ट पोलराइजेशन जुइ मखु ।'
