वन उपभोक्तापाखें निगूगु चरणया आन्दोलन घोषणा
येँ (सन्ध्या टाइम्स)/सामुदायिक वन उपभोक्ता महासंघ नेपालं थौं निगूगु चरणया आन्दोलनया ज्याझ्वः घोषणा याःगु दु ।
निगूगु चरणया आन्दोलनया ज्याझ्वः कथं वइगु असोज १० गते फुक्क हे जिल्लाया जिल्ला वन ज्याकुथिइ छन्हु तालाबन्दी यायेगु जुइ धाःगु दु। अथे हे धर्ना, जुलुस नं यायेगु जुइ धकाः महासंघं धाःगु दु ।
तत्कालिन मन्त्रिपरिषद्या निर्णय कथं वन ऐन २०४९ व नियमावली २०५९ संशोधन याना सामुदायिक वनया अधिकार कटौती यायेत्यंगुया विरोधय् थःपिंसं आन्दोलन याना वयाच्वनागु खः धकाः महासंघं घाःगु दु ।
महासंघं वन एन संशोधन विधयेक तत्काल लित कायेमाःगु, वनय् केन्द्रीकरण, सैनिकीकरण, निरंकुशताया अन्त्य यायेमाःगु, आर्थिक स्वायत्रताया हस्तक्षेप बन्द यायेमाःगु, सामुदायिक वनय् हदबन्दी लागू यायेमाःगु व प्राथमिकता प्रणाली चीकेमाःगु माग याना आन्दोलन याना वयाच्वंगु खः। थःपिनिगु माग पूरा मजुल धाःसा सशक्त कथं आन्दोलन यायेमाली धकाः सामुदायिक वन उपभोक्ता महासंघं धाःगु दु ।
