न्ह्यइपुक न्ह्याःगु बौद्ध न्ह्यसः लिसः कासा
बौद्ध शिक्षायात छेँय् छेँय् थ्यंकेगु ताः तयाः बुद्ध धर्मया आधारभूत शिक्षा ब्वंपिं (प्यंगूगु पुचः) या धर्म पासापिं मुनाः संघरक्षित स्थविरया नेतृत्वय् बुद्धशिक्षा जागरण समिति नीस्वंगु खः। उगु समितिया मू ताःतुना धइगु न्ह्यइपुगु माध्यमं बुद्ध धर्मया प्रचार यायेगु खः। थ्व झ्वलय् विहार प्रमुख संघरक्षित भन्तेया बुन्हि लाकाः समितिया न्हापांगु कुतः कथं १२-१५ दँ दुपिं मस्तय्गु 'बौद्ध न्ह्यसः लिसः कासा' जुल ।
कासाय् ५४ म्ह मस्तय्गु सहभागिता दुगु खः। कासाय् निंतिं हे धकाः भिक्षु संघरक्षितया सम्पादनय् ४२५ गू न्ह्यसः-लिसः दुगु बौद्ध सामान्य ज्ञान (बुद्ध जीवनी विशेषांक दुगु) सफू पिदंगु खः ।
कासाय् दशपारमिताया छगू छगू नां बियाः स्वम्ह स्वम्हेसिगु पुचःत स्वंगु खः। प्रत्येक पुचलय् न्हाप, लिउ व लियांलिउ जूपिं फाइनलय् थ्यंगु खः। फाइनल थ्यंपिं खुगुलिं पुचः दथुइ धेंधेंबल्लाः जूगु खः। अन्तय् अमिर तुलाधर, वर्षा शाक्य व नसना तुलाधर दुथ्याःगु 'क्षान्ति' पुचलं १९ अंक हयाः न्हापांगु थाय् काःगु खः। निगूगु थासय् १६ ल्याः हःपिं स्वंगू पुचः दत। थ्व अवस्थाय् निर्णायक मण्डलं स्वंगुलिं पुचःयात लिउ घोषणा यानाः न्ह्यइपुगु निर्णय यानाबिल ।
कासाय् सामान्य न्ह्यसःलिसः, भिजुअल राउण्ड व र्यापिड राइटिङ राउण्ड यानाः स्वंगू कथं न्ह्यसः न्यनेगु ज्या जूगु खः। भिजुअल राउण्डय् बुद्धया जीवनय् जूगु महत्वपूर्ण घटनाया किपा क्यनाः न्ह्यसः जूगु खः। नापं भन्न्तेपिनिगु किपा क्यनाः भन्तेपिं च्वनाबिज्याःगु विहार, अले वसपोलपिनि योगदान बारे छुमां बियाः न्ह्यसः न्यंगु खः ।
निर्णायक मण्डलय् सुमेघ महास्थविर, संघरक्षित स्थविर, त्रिरत्न मानन्धर 'कोविद', अनिता मानन्धर, भावना बज्राचार्य, महेन्द्रमान बज्राचार्य, बृद्धिमान शाक्य, सरोजिनी चित्रकारपिं च्वनादीगु खःसा न्ह्यसः लिसः कासा विद्या सागर तुलाधर व रोशना तुलाधरं न्ह्याकादीगु खः ।
ज्याझ्वः क्वचायेकाः शनिवाः विजेतापिंत सिरपाः बीगु ज्याझ्वः जुल। बुद्ध शिक्षा जागरण समितिया छ्याञ्जे अम्बिकालक्ष्मी तुलाधरं लसकुस बियाः न्ह्याकूगु उगु ज्याझ्वलय् निर्णायक मण्डलया दुजःपिंत खादा व हनपौ लःल्हाःगु खः। कासाय् त्याःपिंत बुद्धमूर्ति, बुद्ध धर्म सम्बन्धि सफू नापं सकलें सहभागीपिंत दसिपौ लःल्हाःगु खः। मस्तय्त उमित यइगु माध्यमं बुद्ध धर्म सम्बन्धी ज्ञान व शिक्षा बीगु ताः तयाः थ्व ज्याझ्वः जूगु खः ।
