प्रधानसेनापतिया कारवाही दिकेत राष्ट्रपतिया पौ

राष्ट्रपतिय डा. रामवरण यादवं प्रधानसेनापतियात अवकाश बीगु ज्या संविधान व कानुन विपरित जुइगुलिं उकीयात दिकेत सुझाव सहितया पौ प्रधानमन्त्रीयात मंगलवाः छ्वःगु दु ।

संविधानया संरक्षकया हैसियतं गैरसंवैधानिक ज्या दिकेमाःगु थःगु कर्तव्य जूगु खँ न्ह्यथंसें पौ छ्वःगु खः । माओवादी नेतृत्वया सरकारं प्रधानसेनापति रुकमांग कटुवालयात स्पष्टिकरण कयाः अवकाश बीत्यंगु ईलय् राष्ट्रपतिं थंज्याःगु पलाः ल्ह्वंगु खः । राष्ट्रपतियात थ्व अधिकारया खँय् संविधानविदतय् दथुइ सहलह जुयाच्वंगु दु ।

थ्वस्वयां न्ह्यः संविधान सभाय् दुथ्याःगु झिंखुगू दलं मंगलवाः निन्हये राष्ट्रपति डा. रामवरण यादवयात नापलानाः संवैधानिक अधिकार छ्यालाः माओवादी नेतृत्वया सरकारयात थंज्याःगु निर्णय याये पाखें दिकेत इनाप याःगु खः ।