त्वनेगु लः व सरसफाइलय् समाहीकरण
यल (सन्ध्या टाइम्स)/त्वनेगु लः व सरसफाइया ख्यलय् नं लैङ्गिक व बर्गीय लिधंसाय् समान सहभागिता जुइकेत यलय् 'त्वनेगु लः व सरसफाइ ख्यलय् लैङ्गिक समाहीकरण' विषयय् स्वन्हुयंकंया गोष्ठी जुल ।
यूएन हाबिट्याट व जेण्डर वाटर एलायन्सया ग्वसालय् जूगु उगु कार्यशाला गोष्ठीया न्हापांगु चरणया ज्याझ्वः वंगु भाद्र २४-२८ गते तक यलय् जूगु खः। वयां लिपा लाओस, भियतनाम, इण्डोनेसिया, क्याम्बोडिया लगायतया एशियाली देशय् नं थज्याःगु गोष्ठी जुइधुंकूगु दु ।
ज्याझ्वलय् यूएन हाबिट्याटया निमित्त प्रमुख प्राविधिक सल्लाहकार सुधा श्रेष्ठ, जेण्डर वाटर एलायन्सया उपनिर्देशक इष्टर डे जोङ्गं नं ज्याझ्वः बारे कनादीगु खः।
गोष्ठीया न्हापांगु न्हि जेण्डर वाटर एलायन्सया अमिता कौसिकं त्वनेगु लः व सरसफाईया ख्यलय् मिसा व मिजंया सहभागिता मापन याइगु सिद्धान्ततय् बारे जानकारी बियादीगु खः। लिसें वय्कलं त्वनेगु लः व सरसफाई लगायत बिकासया मेमेगु ख्यलय् नं लैङ्गिक समाहीकरण कार्यान्वयन यायेबलय् खने दइगु समस्याया बारे बिचाः प्वंकादीगु खः।
