शान्ति व संविधानया स्पष्ट खाका माग
संविधानसभाय् दुथ्याःगु झिंखुगू दलं शान्ति व संविधानया स्पष्ट खाका पेश यायेत एनेकपा (माओवादी) व नेकपा (एमाले)यात माग याःगु दु ।
माओवादी व एमालेया पहलय् शुक्रवाः माओवादी संसदीय दलया ज्याकूथी जूगु बैठकय् झिंखुगू दलं निगू दल दथुइ जूगु सहमति सकारात्मक जूगु प्रतिकृया ब्यूगु खः । उगु इलय् थीथी दलया नेतातय्सं माओवादी व एमालें शान्ति व संविधान निर्माणया स्पष्ट खाका पेश याःसा जक कांग्रेसयात नं सहमतिलय् हयेफइगु धासें खाका पेश यायेत इनाप याःगु खः ।
बैठकय् निगू तःधंगु वाम दलतय्सं थःपिं दथुइ जूगु सहमति छुं नं कथंया गठबन्धन मजूगु स्पष्ट यासें थुगु सहमति संविधान निर्माण व शान्ति प्रकृयायात तार्किक निष्कर्षय् थ्यंकेत जूगु धयादिल । बैठकय् कांग्रेस व मधेशी मोर्चाया घतकतय्त नं ब्वनातःगु खसां निगूलिं पक्षं ब्वति मकाः ।
सहलह लिपा एमाले अध्यक्ष झलनाथ खनालं माओवादी व एमाले दथुइ शान्ति व संविधानया निंतिं जूगु सहमतिया बारे बैठकय् जानकारी बियाःगु धयादिसें थुकी झिंखुगू दल सकारात्मक जूगु कनादिल ।
