'लोकतन्त्रयात बल्लाकेगु हे आःया प्रमुख आवश्यकता'
राष्ट्रपति डा. रामवरण यादवं लोकतन्त्रयात बल्लाकेगु हे आःया प्रमुख आवश्यकता जूगु खँ धयादीगु दु ।
भ्वतया धौख्यलय् शुक्रवाः काठमाडौं विश्वविद्यालयया विद्यार्थी कल्याण परिषद्ं याःगु 'नेपाली मौलिकताया युवा ऐक्यवद्धता' महोत्सवया उलेज्या यानादिसें राष्ट्रपति यादवं लोकतन्त्रयात बल्लाकेत ल्वाभःया राजनीति क्वचायेकेमाःगु धयादिल । वय्कलं ल्वाभःया राजनीतिं हे शान्ति व संविधान धरापय् लाकूगु धयादिसें लोकतन्त्रयात बल्लाके फत धाःसा जक देय् समृद्ध जुइगु धयादिल ।
शिक्षा व स्वास्थ्ययात राजनीतिं मुक्त यायेमाःगु धयादिसें राष्ट्रपति यादवं दक्ष जनशक्ति उत्पादनया निंतिं काठमाडौं विश्वविद्यालय थें गुणस्तरी शिक्षा प्रदान याइगु विश्वविद्यालयया आवश्यकता दुगु धयादिल । दँय्दसं लखौं ब्वनामिपिं अध्ययनया निंतिं देशं पिने वनीगु झ्वः दिकाः इमित थःगु हे देशय् शिक्षा व रोजगारी बिइगु प्राविधिक अनुसन्धानमूलक व व्यवहारिक शिक्षा बीमाःगु खँय् वय्कलं बः बियादिल ।
अथेहे ज्याझ्वलय् काठमाडौं विश्वविद्यालयया उपकुलपति डा. सुरेशराज शर्मां देय्या सर्वाङगीण विकासय् शिक्षा क्षेत्रया महत्वपूर्ण भूमिका दुगु धयादिसें सरोकारवाला फुक्क जागरुक जुइमाःगु धयादिल ।
ज्याझ्वलय् राष्ट्रपति यादवं मोहनगोपाल खेतान स्मृति भवन कन्या छात्रावास व गोपालराज राजभण्डारी स्मृति कर्मचारी आवास भवन नं उलेज्या यानादिल । स्वन्हू तक न्ह्याइगु महोत्सवय् ब्वनामितय्सं उत्पादन याःगु थीथी विज्ञान ज्वलं, नसाज्वलं, सांगीतिक नापंया ज्वलं तयातःगु दु ।
