कांग्रेसयात उम्मेदवारी लितकायेत प्रमया इनाप
प्रधानमन्त्री माधवकुमार नेपालं प्रधानमन्त्री पदया प्रत्यासी रामचन्द्र पौडेलयात उम्मेद्वारी लितकायेत इनाप यानादीगु दु ।
बाराया सिमराय् थौं एमालेया क्षेत्रीय कार्यक्रता नापलायेगु भुवलय् प्रधानमन्त्री नेपालं दलत दथुइया सहमति व सहकार्यया निंतिं पौडेलयात उम्मेद्वारी लितकायेत इनाप यानादिल । अनमिनया म्याद लिपांगु खुसिइ तंगु धयादिसें वय्कलं आः प्यला दुने सेना समायोजनया ज्या क्वचायेका अनमिनयात लितछ्वयेगु धयादिल ।
माओवादीं ल्वाभः व राजनीतियात नापनापं यंकेगु ज्या त्वःतेमाःगु धयादिसें प्रधानमन्त्री नेपालं अथे याःसा जक माओवादीं मेमेगु राजनीतिक दलया विश्वास त्याके फइगु धयादिल । अथेहे वय्कलं पुलांम्ह जुजु ज्ञानेन्द्रयात पुलांगु हे हैसियत कथं ज्या मयायेत ख्याच्वः नं बियादिल ।
गृह जिल्ला रौतहट व पर्साय् थीथी ज्याझ्वलय् ब्वति कया: प्रधानमन्त्री नेपाल थौं हे येँ लिहाझायादीगु दु ।
