कोइराला सीएनएन हिरोजया न्हापांगु झिम्हय् ल्यल

माइती नेपालया नकिं अनुराधा कोइराला सीएनएन हिरोज एवार्डया न्हापांगु झिम्हया ल्यज्याय छनौट जुइत ताःलानादीगु दु ।

सीएनएनं दँय्दसं सामाजिक, राजनीतिक, स्वास्थ्य, मानवअधिकार व वातवरणीय क्षेत्रय् योगदान बियावःपिन्त सीएनएन हिरोज एवार्ड बिइगु यानावयाच्वंगु खः । माइती नेपालया नकिं कोइराला थुगु दँया निंतिं न्हापांगु झिम्हय् लायेत ताःलागु खः । वय्कः प्रोक्टेक्टिङ द पावरलेस पुचः अन्तर्गत मानव बेचविखन रोकथामय् यानादीगु योगदानया लिधंसाय् मनोनित जुयादीगु खः । थुकथं ल्यःपिं झिम्ह मध्ये अनलाइन भोटया लिधंसाय् वइगु नाभेम्बर २५ य् घोषणा याइ । येँय् थौं याःगु छगू ज्याझ्वलय नकिं कोइरालां मानव बेचविखन रोकथामयात प्रभावकारी दयेकेत थःत भोट याना: ग्वाहालि यायेत इनाप यानादिल ।