वार्ता मखु आन्दोलन : थारु आन्दोलनकारी
थारु अगुवातय्सं सरकारनाप वार्ताया लुखाः बन्द जूगु धासें आन्दोलन यायेगु निर्णय याःगु दु ।
मंगलवाः भरतपुरय् पत्रकार सम्मेलन यासें थरुहट मंकाः संघर्ष समिति लगायत मेगू थीथी थारु संस्थातय्सं लच्छि न्ह्यः सरकार नाप जूगु खुगू बुँदे सहमति कार्यान्वयन मजूगु धासें बुधवाः निसें आन्दोलन यायेगु जानकारी ब्यूगु दु । पत्रकार सम्मेलनय् थारु नेतातय्सं सरकारं पटक पटक झंगःल्हायेगु ज्या याःगुलिं वार्ताया लुखाः बन्द जूगु धयादिल ।
पत्रकार सम्मेलनय् ब्यूगु जनकारी कथं बुधवाः निसें आम हड्ताल, सरकारी ज्याकूथी तालाबन्दी, जल, जंगल व जमिनय् कब्जा, कर संकलन, थरुहट सेनाया निर्माण, स्थानीय सत्ता कब्जा व 'चितवन राष्ट्रिय निकुन्ज'यात 'थरुहट राष्ट्रिय निकुन्ज' घोषण लगायत आन्दोलनया ज्याझ्वत सार्वजनिक याःगु दु ।
सरकारं चैत १ गते थारु मंका संघर्ष समिति नाप खुगू बुँदे सम्झौता याःगु खः ।
