दलत छप्पँ मजूगुलिं देय् संकटय् : प्रम
प्रधानमन्त्री माधवकुमार नेपालं राजनीतिक दलत छप्पँ मजूगु कारणं देय् संकटय् लाःगु खँ धयादीगु दु । वय्कलं दलत दथुइ एकता व सहकार्य मजूगु कारणं हे देय्या अवस्था गम्भीर जुयावंगु धयादिल ।
बिहीवाः थःगु गृहजिल्ला रौतहटय् थ्यंकादीम्ह प्रधानमन्त्री नेपालं दलत सहमति व सहकार्य कथं न्ह्याः वनेमाःगु खःसां वयाः अःख न्ह्याः वनाच्वंगु द्वपं बियादिल । वय्कलं दलतय् प्रमुख प्राथमिकता संविधान व शान्ति प्रकृया जूगु धयादिसें वयां लिपाः जक कुर्सीया खँ वइगु धयादिल ।
रौतहटया सन्तपुर गाविसय् च्वंगु सुबला भागवत बहुमुखी क्याम्पसया उलेज्या यानादिसें नेपालं माओवादीं प्रधानमन्त्रीया निर्वाचनं उम्मेदवारी लितकाःगुयात लसकुस यानादिल । नेपालं कांग्रेसया महाधिवेशन जुयाच्वंगु सहमतिया कुतः न्ह्याः वनेमफुगु धयादिसें आः कांग्रेस महाधिवेशन लिपा सहमति जुइगु विश्वास प्वंकादिल ।
