स्थानीय विकास मन्त्रालय् बम आतंक

छम्ह अज्ञात मनूखं फोन यानाः स्थानीय विकास मन्त्रालयलय् बम तयातःगु सूचं बीवं अन बम आतंक जूगु दु । तराई भाइरस नांया संगठनया दुजः धकाः दावी याम्ह छम्ह मनूखं येँया जिल्ला अधिकारी लक्ष्मीप्रसाद ढकालयात फोन यानाः यलया पुल्चोय् च्वंगु मन्त्रालयलय् बम दुगु जानकारी बीवं मन्त्रालयलय् बम तयातःगु आशंकाय् प्रहरीं अनुसन्धान न्ह्याकूगु खः । तर घण्टौं तक याःगु सर्चया झ्वलय् नं अन छुं नं कथंया बम मलूगु खँ धाःगु दु ।

सुथसिया ९ बजे फोन वयेवं सेना, सशस्त्र व जनपद प्रहरीया बम डिस्पोजल पुचः नापं तालिम प्राप्त खिचा हःया बम मालेगु ज्या याःगु खःसां अन छुं लइकेमफुत । अनुसन्धानया झ्वलय् प्रहरीं मन्त्रालयया कर्मचारी व सेवाग्रहीतय्त ज्याकू वनेत रोक लगे याःगु खः ।

प्रहरीं फोन याम्ह मनूखं येँया न्यूरोडय् च्वंगु छगू पिसिओं फोन याःगु खँ धाःगु दु ।