रोष्ट्रम घेराउ लिपा बैठक स्थगित
प्रमुख प्रतिपक्षी दल नेपाली कांग्रेस व तराई-मधेश लोकतान्त्रि पार्टीं रोष्ट्रम घेराउ यायेवं मंगलवाः च्वंगु व्यवस्थापिका संसदया बैठक बिहिवाः तकया निंतिं स्थगित जूगु दु ।
थ्वस्वयां न्ह्यः बैठकय् न्ववासें माओवादी बाहेकया दलतय्सं नकतिनि सरकारं प्रधानसेनापतियात काःगु स्पष्टिकरणयाः विरोध याःगु ख:।
बैठकय् न्ववासें कांग्रेसया वरिष्ठ नेता शेरबहादुर देउवां सर्वोच्चय् बहस जुयाच्वंगु मुद्दायात सरकारं ल्ह्वना कानुन विपरित ज्यायाःगु धयादिल । वयेकलं प्रधानसेनापतिकय् काःगु स्पष्टिकरण असंवैधानिक जूगु धासें माओवादी नेतृत्वया सरकारं याःगु निर्णयया विरोध यानादिल । अथेहे नेता देउवां राष्ट्रिय खेलकुद धेंधेंबल्लाय् कासामितय्सं ब्वति माकेगु थःगु व्यक्तिगत स्वतन्त्रताया खँ जूगु धयादिल । वयेकलं सेनां नं देशय् गणतन्त्र हेयेत ग्वहालि याःगुलिं सुभाय् बी माःगु थासय् प्रधानसेनापतियात अवकाश यायेगु कुतः यायेगु खँया विरोद्ध यानादिल । वयेकलं सरकारं स्पष्टिकरणया निर्णय लितः मकातल्ले बैठक बहिष्कार यायेगु धायेवं रोष्ट्रम घेराउ शरु जूगु खः ।
माओवादी नेता सीपि गजुरेलं प्रधानसेनापितं सरकार स्वयां च्वेये च्वनेत स्वःगु धासें कांग्रेसं जनताया सर्वोच्चतायात बेवास्था यासें सैन्यतन्त्रपाखे न्ह्यावनाच्वंगु द्वपं बियादिल । वयेकलं आःया आवश्यकता सहमति याना वनेगु खः धासें सहमति बिन न्हूगु संविधान निमार्ण यायेमफइगु खँ धयादिल ।
एमालेया नेता प्रदीप ज्ञवालीं माओवादी सर्वोच्चय् बहस जुयाच्वंगु विषययात कयाः प्रधानसेनापतियात स्पष्टिकरण काये ज्यू की मज्यू धकाः न्ह्यसः तयादिल । वयेकलं माओवादीं रक्षा मन्त्रालयया जिम्मेवारी कायेधुंकाः सेनायात स्वेयेमाःगु थासय् वाईसीएलयात अप्व महत्व ब्यूगु द्वपं बियादिल ।
अथेहे बैठकय् न्ववासें मधेशी जनअधिकार फोरमया नेता शरदिसंह भण्डारीं देया हितया निंतिं थःगु पार्टीया माग अथें तयाः सहमतिया लँपूलय् वनाच्वं धासें दक्व दलत सहमति याना न्ह्याः वनेमाः धयादिल । अथेहे तमलोपाया नेता हृदेश त्रिपाठीं सेनां राष्ट्रिय खेलकुद धेंधेंबल्ला बहिष्कार याना ठीक याःगु खँ धयादिल । बैठकय् राप्रपाया नेता लोकेन्द्रबहदुर चन्द, नेमकीपाया लीला न्याईच्याइं लगायतया सभासदतय्सं नं सरकारी निर्णया विरुद्ध न्ववानादीगु खः ।
बैठक आः बिहिवाः च्वनी ।
